HOWARD MASHABA A VONIWA NANDZU HI KHOTO YA GIYANI

GIYANI- N'wamabindzu wa le Giyani, Howard Alex Mashaba (45), u voniwe nandzu a tlhela a gweviwa hi huvo ya le Giyani endzhaku ko kumeka nandzu wa ku chavisa Rosinah Mashele na ku tlula nawu wa nsirhelelo (protection order).
Hi ku ya hi Ndzawulo ya Maphorisa ya Afrika-Dzonga (SAPS) eLimpopo, milandzu leyi yi sungule hi 4 N'wendzamhala 2024, loko Mashaba a ya endlwini ya wansati loyi a nga hirha yindlu leyi a yi lawuriwa hi Ndzawulo ya Mintirho ya Mfumo.
SAPS yi ri Mashaba u lerise Mashele loyi anga mutirhi waka SASSA ku suka endlwini, a vula leswaku yena u xavile yindlu ya kona. Wansati u ale ku suka, a hlamusela leswaku hi yena a a ri muhiri wa le nawini.
Hi ku ya hi SAPS, Mashele u tlhele a vula leswaku Mashaba na vanhu lava a a ri na vona va n'wi chavise, ku katsa na ku tsema gezi endlwini ya yena ni ku penda makhumbi ya yindlu hi pende yo tshwuka.
Hi 5 N'wendzamhala 2024, wansati loyi u yile eka huvo ya Magistrate ya Giyani ku ya endla xikombelo xa nsirhelelo eka Mashaba laha swi nga va tano.

Maphorisa va tlhelo va kombisa leswaku hi 2 Mhawuri 2024, Mashaba u tlhele a n'wi landza entirhweni, laha a ri na ntlawa wa vanhu. Ku vuriwa leswaku u n'wi chavise a tlhela a n'wi rhuketela emahlweni ka vatirhi-kulobye, ku katsa ni marito lama a ma khumba vuxaka bya yena bya munhu wo karhi.
Wansati loyi u vikile mhaka leyi eka Magistrate wa Giyani, laha ku nga humesiwa ndzeriso wo khoma Mashaba.
Mhaka leyi yi hundziseriwe eka Provincial Anti-Corruption Unit ePolokwane leswaku yi ya lavisisiwa.
Mashaba u khomiwile hi 21 Mhawuri 2024 naswona u humelele ehubyeni ya Magistrate ya Giyani minkarhi yo hlayanyana.
Hi 8 Khotavuxika 2026, Mashaba u voniwe nandzu eka swihehlo haswimbirhi, ku nga ku chavisa munhu na ku tlula nawu wa nsirhelelo.
Mhaka leyi yi yisiwe endzhaku ku ya fika eka 22 Ndzati 2026 leswaku ku ta humesiwa xigwevo.

Hi Ravumbirhi, 22 Ndzati 2026, Huvo ya Magistrate ya Giyani yi gweve Mashaba hi ndlela leyi landzelaka:
Ku chavisa munhu: Xigwevo xa R10 000 kumbe tin'hweti ta ntsevu ekhotsweni, ku engeteriwe tin'hweti ta 12 ta ku pfaleriwa ekhotsweni leti tinganga yirisiwa ku ringana ntlhanu wa malembe, hi swipimelo swo karhi.
Ku tlula nawu wa nsirhelelo: Xigwevo xa R15 000 kumbe tin'hweti ta kaye ekhotsweni, ku engeteriwe tin'hweti ta 12 leti yirisiweke ku ringana ntlhanu wa malembe, hi swipimelo swo karhi.
Mupfhumba wa Mapolisa eLimpopo, Lieutenant General Jan Scheepers, u bumabumele Provincial Anti-Corruption Unit hi ku fikelela ku gweviwa na ku gweva ka nandzu lowu.
Scheepers u tlhele a vula leswaku SAPS yi ta ya mahlweni yi tiyisisa leswaku milandzu ya vugevenga yi lavisisiwa hi vukheta naswona lava kumekaka va ri na nandzu va yisiwa ehubyeni, ku nga handle ka xiyimo xa vona xa swa ikhonomi kumbe xa vaaki.